Akademik Məlumat İdarəetmə Sistemi
Other, pp.302-310, 2021
Hər bir dövlətin daxili siyasətinin prioritet istiqamətlərindən biri məhz onun sosial siyasətidir. Sosial siyasət dövlətin həyata keçirdiyi sosial proqramlarda, əhalinin əsas sosial qruplarının marağını əsas götürərək, cəmiyyətdəki münasibətlərin tənzimlənməsində təzahür edir. Azərbaycan Respublikasının müasir sosial siyasətinin formalaşmasının əsası Ümummilli Lider Heydər Əliyev tərəfindən böyük uzaqgörənliklə müəyyən edilmiş və "Əhalinin sosial müdafiəsi sahəsində əlavə tədbirlər haqqında" imzalanmış sənəddə əks olunmuşdur. Azərbaycan dövlətinin sosial siyasət konsepsiyası sosial ədalətin bərqərar olunmasına, milli sərvətlərin artırılmasının təmin edilməsinə və milli sərvətlərin ədalətli bölgüsünün həyata keçirilməsinə istiqamətlənmiş proqramlar şəklində həyata keçirilən davamlı və dinamik prosesdir. Sosial siyasətin əsas hədəfləri Azərbaycan Respublikası Prezidentinin 29 dekabr 2012-ci il tarixli Fərmanı ilə təsdiq edilmiş "Azərbaycan 2020: gələcəyə baxış" İnkişaf Konsepsiyasında dolğun şəkildə öz əksini tapmışdır. Bu konsepsiyaya görə Azərbaycan Respublikasının sosial siyasət sahəsində başlıca hədəfi əhalinin bütün qruplarının ədalətli sosial təminatını həyata keçirməklə sosial rifah dövlətinin qurulmasıdır. Bu gün aztəminatlı ailələrə, müharibə veteranlarına və əlillərinə, şəhid ailələrinə mənzillərin və avtomobillərin verilməsi, əlillərin reabilitasiyası, ailə, qadın və uşaq problemlərinə yüksək diqqət, əhalinin məşğulluğunun təmin edilməsi, uğurlu gənclər siyasəti, cəmiyyətin hər bir üzvünün mənafeyinin nəzərə alınması Heydər Əliyevin hakimiyyətə qayıdışından sonra dövlətin iqtisadi imkanlarına uyğun olaraq vüsət almağa başladı. O cümlədən yoxsulluğun aradan qaldrılması üçün mühüm işlər görüldü.
Bir peşə və sosial elm intizamı olaraq sosial iş
sosial siyasətlə sıx əlaqəlidir. Sosial işin peşəkar
məqsədi sosial problemləri həll edərək sosial rifah səviyyəsini artırmaqdan
ibarətdir. Yəni, işsizlik,
yoxsulluq, qayğıya ehtiyac,
ayrıseçkilik, təcrid və s. sosial problemləri həll etməkdir. Sosial siyasət isə sosial problemlərin
həlli üçün planları, proqramları, xidmətləri və tətbiqləri formalaşdıran ən
vacib vasitədir. Bu məqsədlə sosial problemlərin təhlili,
bu problemlərin təməlində olan ehtiyacların
müəyyənləşdirilməsi və bu tələblərə cavab verən siyasət və tətbiq etmələrin
reallaşması zamanı sosial iş sosial
siyasət intizamından çox faydalanır.
Bu gün Azərbaycanda sosial iş ən çox ehtiyac
duyulan xidmətlərdən biridir. Ölkəmizdə peşəkar sosial işin dövlət səviyyəsində
təşkil ediləcəyi təqdirdə aşağıdakı nəticələr əldə edilə bilər:
• Yeni iş yerləri açılar;
• Müvafiq universitetlərdə hazırlanan peşəkar sosial işçi kadrları
ixtisasları üzrə işlə təmin olunar;
• Çətin həyat şəraitində yaşayan, yoxsul və əlilliyi olan uşaqlı ailələrin
problemləri tez bir zamanda və effektiv şəkildə yerindəcə həll olunar;
• Heydər Əliyev Fonduna, Prezidentə və Prezident Aparatına, müxtəlif
nazirliklərə, özəl şirkət və təşkilatlara, tanınmış şəxslərə olan şikayət və
yardım üçün müraciətlərin sayı azalar;
• Ölkə əhalisi arasında hökumətə qarşı neqativ münasibət, narazılıq və
gərginlik aradan qalxar, intiharların sayı azalar. http://e-library.unec.edu.az/alisaweb/cs?action=getSubjectAllInfo&subjectId=750606&orgId=1000000&status_tab=yes