Akademik Məlumat İdarəetmə Sistemi
Azərbaycan Yazıcılar Birliyi, Baku, 2020
Mənim üçün çox dəyərli olan hörmətli və əziz oxucularım,
hamınızı salamlayıram! Sizə uzun və mənalı ömür arzulayıram, çünki
mənasız, məqsədsiz yaşanan ömür zülmət gecəyə bənzər, oradan sən
günəşi görə bilməzsən, qibləni və hərəkət istiqamətini düzgün müəyyən
edə bilməzsən, bəşəriyyətin və təbiətin rəngarəngliyini, ruhun,
əqidənin, duyğuların, mənəviyyatın necə ali hisslər olduğunu
anlamadan bu dünyadan köçərsən.
Uca Tanrı müqəddəs kitabımız “Quran” vasitəsi ilə bizə yaşamaq
kriteriysını müəyyən etmişdir. Bu baxımdan hesab edirəm ki, hər yeni
elmli, məntiqli və tərbiyəvi əhəmiyyətə malik olan kitab “Quranın” bir
zərrəsidir və belə kitablara kamil insanlar müvafiq dəyər verirlər.
Şeiri yazmaq, oxumaq və duymaq hissi hər insana verilməyib və
bu baxımdan, mənim bu kitabımı oxuyan, məni başa düşən butun
insanlara şəxsən öz adımdan dərin minnətdarlığımı bildirirəm. Bu gün
dünyada gedən prosseslərdən baş çıxararaq yaşayan və bununla bərabər
öz ruhunu, ləyaqətini və əqidəsini sağlam saxlaya bilən insanlar
mənim nəzərimdə çox dəyərli və şəxsiyyətli insanlardırlar.
Əlbəttə, içtimai-iqtisadi formasiyanın insanın formalaşmasında
rolu danılmazdır, lakin istənilən halda öz şəxsiyyətini, əqidəsini və
ləyaqətini itirməyənlərə kamil bir şəxsiyyət kimi baxmaq lazımdır. Şeir
insanın dünyanı anlaması üçün və düzgün həyat tərzi seçməsi
baxımından vacib bir tədris vasitəsidir. Yaddan çıxarmaq olmaz ki, heç
bir insan yaşadığı ömrü yenidən yaşaya bilməz. Ona görə verdiyi
qərarlarda səhv etməmək və mənalı yaşaması üçün çoxlu elmi, ədəbi
əsərlər oxumalıdır ki, ömrü nadanlıq və cahillik içində keçməsin.
Bu mənim 4-cü şeir kitabımdır və mən bu kitabımda ruhuma təsir
edən məqamları, mövcud problemləri görərək, məntiqi duyğularımdan
keçirərək şeir formasında Sizə təqdim edirəm. Unutmayaq ki, kitablar
bizi daha müdrik edir.
Hamınıza müdruklik, can sağlığı və uğurlar arzulayıram !