Azərbaycanın əməklə bağlı beynəlxalq standartların tanıması və həyata keçirməsi sahəsində aktiv fəaliyyəti, xüsusən həyata keçirilən və daima təkmilləşdirilən sosial islahatlar (pensiya, sosial sığorta, tibbi xidmət və s.) baxımından sosial təminatla bağlı beynəlxalq sənədlərin rolu artır. Bu məsələdə Azərbaycan Respublikasının 25 yanvar 2001-ci il tarixdə Avropa Şurasına tamhüquqlu üzv qəbul edilməsi və həmin il «İnsan hüquq və əsas azadlıqlarının müdafiəsi haqqında» Avropa Konvensiyasını ratifikasiya etməsi mühüm rol oynayır. Ölkəmiz həmçinin Avropa İnsan Hüquqları Məhkəməsinin yurisdiksiyasını tanıyır. Bu Məhkəmənin bir sıra qərarları birbaşa və ya dolayı şəkildə sosial təminatla bağlıdır. Hesab edirik ki, beynəlxalq öhdəliklərin vicdanla icra olunması prinsipinə uyğun olaraq beynəlxalq hüququn müddəalarının dövlətdaxili səviyyədə reallaşdırılması ilə əlaqədar gələcəkdə məhkəmələrin fəaliyyətinin təkmilləşdirilməsinin labüdlüyü baxımından məhkəmələrə müxtəlif kateqoriya işlərə baxılması zamanı beynəlxalq hüququn hamılıqla qəbul edilmiş norma və prinsiplərinin tətbiqi məsələləri üzrə şərhlərə əsaslanmaq səlahiyyətlərinin verilməsi məqsədəmüvafiq olardı