Akademik Məlumat İdarəetmə Sistemi
vol.4, no.2, pp.376-380, 2025 (SSCI)
Xülasə Sosial innovasiyanın dayanıqlı inkişaf prosesindəki rolunu araşdırır və onun sosial, iqtisadi və ekoloji sahələrdə necə yeni imkanlar yaratdığını təhlil edir. Müasir dünyada iqlim dəyişikliyi, sosial bərabərsizlik, urbanizasiya və resurs çatışmazlığı kimi qlobal problemlər daha kreativ və inklüziv həll üsullarına ehtiyac yaradır. Sosial innovasiya məhz bu ehtiyaca cavab verən, cəmiyyətin müxtəlif qatlarını əhatə edən və yeni yanaşmalar vasitəsilə sosial rifahı artırmağa yönəlmiş dəyişikliklər toplusudur. Dayanıqlı inkişaf BMT-nin müəyyən etdiyi sosial, iqtisadi və ekoloji balansı hədəfləyən qlobal strategiyadır. Sosial innovasiya bu strategiyanın icrasında mühüm vasitə rolunu oynayır. Sosial sahibkarlıq, icma əsaslı layihələr, rəqəmsal platformalar, yaşıl texnologiyalar və mikro-maliyyə kimi modellər dayanıqlı inkişaf məqsədlərinə çatmaqda vacib mexanizmlərdir. Məsələn, paylaşılan nəqliyyat sistemləri şəhər mobilliyini yaxşılaşdırır və karbon emissiyalarını azaldır; sosial startaplar isə sosial bərabərliyi gücləndirir və yeni məşğulluq imkanları yaradır. Məqalə həmçinin gənclərin sosial innovasiyadakı aparıcı rolunu vurğulayır. Onların yaradıcı düşüncəsi, texnologiyaya çıxışı və sosial məsələlərə aktiv münasibəti innovativ layihələrin geniş yayılmasına təkan verir. Nəticə olaraq, sosial innovasiya dayanıqlı inkişaf hədəflərinə çatmaq üçün sadəcə əlavə mexanizm deyil, strateji tələbdir. O, daha ədalətli, ekoloji davamlı və inklüziv gələcəyin qurulması üçün əsas intellektual və praktiki platforma kimi çıxış edir. Açar sözlər: Dayanıqlı inkişaf, sosial innovasiya, sosial sahibkarlıq, inklüziv cəmiyyət, ekoloji davamlılıq, sosial rifah JEL: O35 ,Q01 ,I38,O30,L31