Assoc. Prof. AZƏR MEHTİYEV

02 yanvar 1967-ci ildə Qəbələ  rayonunun Əmirvan kəndində anadan olmuşdur. 1984-cü ildə D.Bünyadzadə adına Azərbaycan Xalq Təsərrüfatı institutuna qəbul olunmuş, 1990-cı ildə N. A. Voznesenski ad. Leninqrad Maliyyə İqtisad İnstitutunun Bakı filialını fərqlənmə diplomu ilə bitirmişdir. Karl Marks təqaüdçüsü olmuşdur. Dövlət İmtahan Komissiyasının qərarı ilə elmi fəaliyyətli davam etdirmək üçün təyinatı həmin instituta verilmişdir.

1990-1991-ci illərdə Azərbaycan Dövlət İqtisad İnstitutunun “Sənaye müəssisələrinin və komplekslərin təşkili, iqtisadiyyatı və idarə edilməsi” kafedrasında laborant vəzifəsində çalışmışdır.

1991-1994-cü illərdə Azərbaycan Dövlət İqtisad İnstitutunda aspirantura təhsili (istehsalatdan ayrılmaqla) almış, 1998-ci ilin martında 08.00.05 – Xalq təsərrüfatının və onun sahələrinin iqtisadiyyatı, planlaşdırılması və idarə edilməsinin təşkili (sənaye) ixtisası üzrə «Azərbaycan sənayesində kiçik müəssisələrin formalaşması və inkişafı məsələləri» mövzusunda namizədlik dissertasiyasını müdafiə edərək iqtisad elmləri namizədi alimlik dərəcəsini almışdır.

1994-1998-ci illərdə Azərbaycan Dövlət İqtisad İnstitutunun “Sənayenin iqtisadiyyatı” kafedrasında baş laborant, 1998-2001-ci illərdə həmin kafedrada müəllim, 2001-2003-cü illərdə Azərbaycan Dövlət İqtisad Univesitetinin “Sənayenin iqtisadiyyatı” kafedrasında baş müəllim vəzifələrində çalışmışdır.

Azərbaycan Respublikası Prezidenti yanında Ali Attestasiya Komissiyasının 2005-ci il 25 oktyabr tarixli qərarı ilə ona dosent elmi adı verilmişdir. 2004-cü ilin yanvarın 1-dən indiyəcən Azərbaycan Dövlət İqtisad Universitetinin “Firmanın iqtisadiyyatı”, “Nəzəri və praktiki iqtisadiyyat” və “İqtisadiyyat” kafedralarında dosenti vəzifəsində çalışmışdır. Hazırda bu vəzifədə çalışmaqda davam edir.

A.Mehtiyev “Firmanın iqtisadiyyatı”, “Sənayenin iqtisadiyyatı”, “Sənayenin təşkili və idarə edilməsi”, “Firmanın inkişaf strategiyası”, “Neft sənayesinin iqtisadiyyatı və idarə edilməsi” və bir sıra başqa fənnləri tədris etmişdir. O, hazırda bakalavriat təhsili səviyyəsində “Firmalar, bazarlar və rəqabət” və “İqtisadi dinamikanın əsasları” fənnlərini tədris edir.

A.Mehtiyev 2017-2018-ci illərdə UNEC-in nəzdində fəaliyyət göstərən D.02.052 Dissertasiya Şurasının daimi fəaliyyət göstərən Elmi seminarının üzvü və “Sahə iqtisadiyyatı” bölməsinin rəhbəri, 2020-2022-ci illərdə FD 1.11 Dissertasiya Şurasının nəzdində 5304.01- “İqtisadi fəaliyyət növləri” ixtisası üzrə yaradılmış elmi seminarın üzvü olmuşdur. O, 2023-cü ildən UNEC nəzdində fəaliyyət göstərən ED 2.10 Dissertasiya Şurasının, 2024-cü ildən BFD 4.21 Birdəfəlik Dissertasiya Şurasının üzvüdür. Eyni zamanda A.Mehtiyev hazırda “Sənayenin təşkili və idarə edilməsi” ixtissası üzrə magistr dissertasiyalarının müdafiəsi komissiyasının üzvüdür.

A.Mehtiyev hazırda iki doktorantın dissertasiyasının elmi rəhbəridir.

15 iyul 2022-ci ildən ictimai əsaslarla UNEC-in Sahə Araşdırmaları və Rəqabətin Təhlili (SART) Mərkəzinə rəbərlik edir.

O, hazırda UNEC Elmi-Metodik Şurasının üzvüdür.

Azər Mehtiyev ümumilikdə 200 ç.v. həcmindən çox 120 elmi, metodik və elmi-praktik əsərin, o cümlədən, 1 dərs vəsaitinin, 5 monoqrafiyanın, 15 tədris proqramının, 25 praktik təyinatlı kitabça və broşürün, 71 elmi məqalə və tezisin müəllifidir. Son hesabat dövründə, yəni 2019-2025-ci illər dövründə A.Mehtiyevin 3 tədris proqramı, 3 elmi məqaləsi və 1 broşürü (araşdırma sənədi) dərc edilmişdir.

A.Mehtiyev ABŞ, Yaponiya, Cənubi Koreya, Malayziya, Çin, Türkiyə, Rusiya Federasiyası və Ukraynanın müxtəlif universitetlərinin iqtisadiyyat fakultələrində təcrübə mübadiləsində olaraq onların tədris proqramları ilə yaxından tanış olmuşdur. Dünyanın 15-dən çox ölkəsində keçirilmiş 50-dək beynəlxalq konfrans və seminarın iştirakçısı olmuş, məruzələrlə çıxış etmişdir.  

A.Mehtiyev Azərbaycan Respublikası Təhsil Nazirliyinin “Qabaqcıl təhsil işçisi” döş nişanı ilə təltif edilmişdir.