Assoc. Prof. İBRAHİM QULİYEV

                                           Quliyev  İbrahim  Qədim  oğlu  1968 – ci  ildə  Tovuz  rayonu  Çataq                rayonunun   Şıxheybət  kəndində (Çataq  kənd  sovetliyi)   anadan  olmuşdur. 1975  -  ci  ildə  Şıxheybət  kənd    8 - illik  məktəbinin  I  sinfinə  daxil  olmuş,VII –IX    siniflərdə  Çataq  və  Hacılar  kənd  orta  məktəblərində    təhsilini  davam  etdirmiş, nəhayət  1985 – ci ildə  Bakı  şəhəri, Nəsimi  rayonu,   M.Hüseynzadə  adına  19  saylı  orta  məktəbin  məzunu  olmuşdur. Həmin  ildə  “Xalq  təsərrüfatının  planlaşdırılması” ixtisası üzrə   D. Bünyadzadə  adına  Azərbaycan  Xalq  Təsərrüfatı   İnstitutuna  daxil  olmuşdur. 1985 – ci  ilin  dekabrında  hərbi  xidmətə  çağırılmış  və  1987 – ci  ilin  dekabrında  ordu  sıralarından  tərxis  olunmuşdur. Bundan  sonra  ali  təhsilini  davam  etdirən  İ.Q. Quliyev  1992 – ci  ildə  Azərbaycan  Dövlət  İqtisad  İnstitutunu  yüksək qiymətlərlə  bitirmişdir.O, həmin  ildə  Azərbaycan  Dövlət  Planlaşdırma  və  İqtisadiyyat   Komitəsinin  ( indi  İqtisadiyyat  Nazirliyi )  Elmi – Tədqiqat  İqtisadiyyat  İnstitutunda “baş  iqtisadçı” kimi  əmək  fəaliyyətinə  başlamışdır.

 İ.Q.Quliyev 1994 – cü  ilin  fevralında  əvvəllər  tələbəsi  olduğu  Azərbaycan  Dövlət  İqtisad  İnstitutuna qayıtmış  və  “ Qiymət ”  kafedrasında   elmi – pedaqoji  fəaliyyətə  başlamışdır.

          İşlədiyi  müddət  ərzində İ.Q.Quliyev  70 – dən  artıq  dərslik, dərs  vəsaiti, fənn proqramları, elmi  məqalə  və  tezislərə  müəlliflik  və  həmmüəlliflik  etmişdir. Onun  yaxından iştirakı və həmmüəllifliyi ilə  “Dünya bazar qiymətləri”adlı dərs vəsaiti (azərbaycan və rus dillərində, 1997, 1999), “Qiymətin əmələ gəlməsi”adlı dərsliklər (2000, 2015,2019), “Tariflər sistemi”adlı dərslik (2018), “İqtisadi  risklərin  qiymətləndirilməsi və  idarə  edilməsi” adlı dərs vəsaiti (2011), “Daşınmaz əmlakın qiymətləndirilməsi” (2015) və “Biznesin(müəssisənin qiymətləndirilməsi” (2015) adlı metodik  vəsaitlər  işıq üzü görmüş,  Tomas NEQLin “Qiymətəmələgəlmənin srtategiyası və taktikası” (2009), eləcə də D.A.Çudakovun  “Qiymətlər və qiymətin əmələ gəlməsi” (2011)  adlı dərslikləri rus dilindən tərcümə olunmuşdur.İ.Q.Quliyev  respublikamızda  “İnvestisiya  layihələrinin   qiymətləndirilməsi”(2019)   adlı  ilk dərs vəsaitinin müəllifidir. 

           İ.Q.Quliyev  “Aqrar  istehsalın  səmərəliliyinin  yüksəldilməsində  qiymət  tənzimlənməsinin  rolu ”  mövzusunda  dissertasiya  işini  müdafiə  edərək “iqtisad  üzrə  fəlsəfə  doktoru ”  elmi  dərəcəsini  almışdır. Hazırda  Azərbaycan  Dövlət  İqtisad  Universitetinin  “ İctimai idarəetmə və sosial  innovasiyalar”  kafedrasının  dosentidir.

           İ. Q. Quliyev  ölkəmizdə  əmlakın  qiymətləndirilməsi  fəaliyyətinin  nəzəri  problemlərinin  araşdırılması  ilə  məşğul  olan  az  sayda  tədqiqatçılardandır.  O,2009-cu ildə  Beynəlxalq Maliyyə Korporasiyasının  təşkilatçılığı ilə  keçirilən sertifikatlaşdırma  imtahanlarında  uğur qazanaraq respublikamızda   “Yaşayış təyinatlı daşınmaz əmlak obyektlərinin qiymətləndirilməsi”  üzrə beynəlxalq sertifikata layiq görülən ilk mütəxəssislərdən biridir. İ.Q.Quliyev 2008 – 2013 - cü  illərdə  Azərbaycan  Qiymətləndiricilər  Cəmiyyətinə  (AQC)  rəhbərlik  etmişdir. İ.Q.Quliyev hazırda Azərbaycan Qiymətləndiricilər Palatasının üzvü,  AQC – nin  İdarə  Heyətinin  üzvü və sədr müavinidir.

           Ailəlidir,  2  övladı  var. Böyük övladı   Güllü Quluzadə  2018-ci ildə Azərbaycan Dövlət İqtisad Universitetini (UNEC) “Menecment” ixtisası  üzrə  “əla” qiymətlərlə, 2020-ci ildə Azərbaycan Kooperasiya Universitetini magistratura pilləsində “Sənayenin təşkili və idarə dilməsi” ixtisası üzrə qırmızı diplomla bitirmişdir. Həmin vaxtdan  Azərbaycan Kooperasiya Universitetində tam ştay vahidi üzrə müəllim vəzifəsinə qəbul edilmişdir və hazırda baş müəllim kimi fəaliyyətini davam etdirir. Ailənin kiçik övladı  Nəzrin Quluzadə  UNEC məzunu olmaqla, 2022-ci ildə bakalavr pilləsində “Statistika “ ixtisasını qırmızı diplomla, 2024-cü ildə isə magistraturanı “İqtisadiyyatın tənzimlənməsi” ixtisası üzrə yüksək qiymətlərlə başa vurmuşdur.Hazırda mühasib kimi çalışır.