Assoc. Prof. NAİLƏ EYVAZOVA

Nailə Eyvazova Kamal qızı 1971-ci ildə Azərbaycan Respublikasının Bakı şəhərində anadan olmuşdur. Orta təhsilini 1978–1988-ci illərdə Bakı şəhəri Nizami rayonu üzrə 129 nömrəli tam orta məktəbdə almış, həmin dövrdə yüksək təhsil göstəriciləri və fəallığı ilə fərqlənmişdir.

1989-cu ildə ali təhsil almaq məqsədilə Azərbaycan Dövlət İncəsənət İnstitutuna daxil olmuş, “Mədəni-maarif işi” ixtisası üzrə təhsil almışdır. 1994-cü ildə institutu bitirdikdən sonra təhsilini davam etdirmək üçün Azərbaycan Dövlət İqtisad İnstitutunun “Maliyyə və kredit” fakültəsinə daxil olmuş və iqtisadiyyat sahəsində fundamental biliklərə yiyələnmişdir. Elmi-pedaqoji fəaliyyətinə 1995-ci ildən Azərbaycan Dövlət İqtisad Universitetində (UNEC) başlamışdır. Universitetdə çalışdığı müddət ərzində tədris və elmi-tədqiqat fəaliyyətini paralel şəkildə inkişaf etdirmiş, iqtisadiyyatın aktual problemlərinə dair araşdırmalar aparmışdır.

 1996-cı ildə dissertantura pilləsinə qəbul olunmuş və uzunmüddətli elmi axtarışların nəticəsi olaraq 2005-ci ildə “Xalq təsərrüfatının iqtisadiyyatı və idarə edilməsi” ixtisası üzrə “Xüsusi təsərrüfatçılıq şəraitində heyvandarlığın inkişaf problemləri” mövzusunda namizədlik dissertasiyasını uğurla müdafiə etmişdir.

N.Eyvazova UNEC-də müxtəlif akademik vəzifələrdə fəaliyyət göstərmişdir. O, 1995–2002-ci  illərdə baş laborant, 2002–2007-ci illərdə müəllim, 2008–2016-cı illərdə baş müəllim, 2017-ci ildə isə dosent əvəzi vəzifələrində çalışmış, pedaqoji fəaliyyəti, elmi potensialı və təşkilatçılıq bacarığı ilə seçilmişdir.

2017-ci ildən etibarən müsabiqə yolu ilə “Nəzəri və praktiki iqtisadiyyat” kafedrasının dosenti vəzifəsinə seçilmişdir.

         N.Eyvazova elmi-pedaqoji fəaliyyəti ilə yanaşı, Azərbaycan Dövlət İqtisad Universitetinin (ADİU) ictimai və elmi həyatında da fəal iştirak edir.  O, zəngin elmi irsə malik tədqiqatçıdır. Onun müəllifi olduğu 50 elmi məqalə, həmmüəllifi olduğu 2 dərslik, 17 tədris proqramı və 5 metodik göstəriş ölkə daxilində və beynəlxalq səviyyədə müxtəlif elmi jurnallarda və nüfuzlu nəşriyyatlarda dərc olunmuşdur. Bu elmi işlər iqtisadiyyatın nəzəri və tətbiqi problemlərini əhatə etməklə yanaşı, ali təhsil müəssisələrində tədris prosesinin təkmilləşdirilməsinə xidmət edir. Alimin tədqiqat nəticələri gənc mütəxəssislərin hazırlanmasında, eləcə də iqtisadi siyasətin elmi əsaslarla formalaşdırılmasında mühüm elmi-nəzəri əhəmiyyət kəsb edir.

Alimin elmi araşdırmaları beynəlxalq elmi bazalarda da tanınmışdır.  Onun Scopus indeksli jurnallarda 2, Web of Science indeksli jurnallarda isə 1 elmi məqaləsi dərc edilmişdir ki, bu da tədqiqatlarının elmi dəyərinin və beynəlxalq səviyyədə tanınmasının göstəricisidir. Bununla yanaşı, rus alimlərinin iqtisadiyyat sahəsinə aid dərsliklərinin Azərbaycan dilinə tərcüməsində iştirak edərək elmi biliklərin yerli elmi ictimaiyyətə çatdırılmasına, tədris ədəbiyyatının zənginləşdirilməsinə və ali təhsildə keyfiyyətin yüksəldilməsinə mühüm töhfə vermişdir.

Nailə Eyvazova beynəlxalq və respublika səviyyəli elmi tədbirlərdə mütəmadi olaraq fəal iştirak edir. O, “İqtisadiyyat və idarəetmə” fakültəsinin təşkilatçılığı ilə 2024-cü ildə keçirilmiş “Müasir dövrün trendləri: Azərbaycanda yaşıl iqtisadiyyat və dayanıqlı inkişaf” mövzusunda İqtisadiyyat və sosial elmlər sahəsində tədqiqatçıların I Beynəlxalq Konfransında “İşğaldan azad olunmuş ərazilərdə innovasiyalı iqtisadiyyatın formalaşması” mövzusunda, eləcə də 2025-ci ildə keçirilmiş İqtisadiyyat və sosial elmlər sahəsində tədqiqatçıların II Beynəlxalq Elmi Konfransında “Dayanıqlı inkişaf və innovasiya iqtisadiyyatı” mövzusu çərçivəsində “Qarabağ və Şərqi Zəngəzur iqtisadi rayonlarında təbiətdən istifadənin iqtisadi problemləri” başlığı altında elmi məruzələrlə çıxış etmişdir. Bu məruzələr regional inkişaf, innovasiya iqtisadiyyatı və dayanıqlı resurs istifadəsi kimi aktual məsələlərin elmi əsaslarla təhlilinə həsr olunmuşdur.

Eyni zamanda, 2018 və 2022-ci illərdə tədris etdiyi fənlər üzrə keçirilən ixtisasartırma və peşəkar inkişaf proqramlarında iştirak etmiş, müasir tədris metodları və innovativ yanaşmalar üzrə bilik və bacarıqlarını artırmışdır. Həmin proqramları uğurla başa vurduğuna görə müvafiq sertifikatlarla təltif olunmuşdur.

Nailə Eyvazova 2001-ci ildən etibarən Yeni Azərbaycan Partiyasının fəal üzvüdür. O, ictimai-siyasi həyatın müxtəlif sahələrində keçirilən tədbirlərdə iştirak etməklə fəallıq göstərir, dövlətçilik prinsiplərinin və milli inkişaf strategiyalarının təbliğində iştirak edir. N.Eyvazova yüksək peşəkarlığı, elmi prinsipiallığı və məsuliyyətli fəaliyyəti ilə seçilən alim və pedaqoqdur.  O, elmi-pedaqoji fəaliyyəti və elmi məktəbin inkişafına verdiyi mühüm töhfələr sayəsində akademik mühitdə dərin hörmət qazanmışdır. Elmi biliklərin geniş ictimaiyyətə çatdırılması və ali təhsilin keyfiyyətinin yüksəldilməsi istiqamətində göstərdiyi ardıcıl və səmərəli fəaliyyət xüsusi təqdirə layiqdir.