Haqqında

MƏRKƏZİN MƏQSƏDİ

Marketinq, İstehlakçı Davranışı və Brendinq Tədqiqat Mərkəzinin məqsədi marketinq, istehlakçı davranışları, brendinq, inteqrasiya olunmuş marketinq kommunikasiyaları, beynəlxalq marketinq, kreativ marketinq, pərakəndə satış, rəqəmsal marketinq, kanal marketinqi, marketinq analitikası, habelə bunlarla əlaqədar strategiya və idarəetmə kimi mövzular başda olmaqla iqtisadi və sosial elmlər üzrə elm sahələrinə dair tədqiqat işlərinin həyata keçirilməsidir. Tədqiqat Mərkəzi marketinqin bütün sahələrində, o cümlədən, ənənəvi və rəqəmsal marketinq alətlərinin də araşdırılması məsələlərinə önəm verir. Tədqiqat Mərkəzi bu məqsədi Azərbaycan da daxil olmaqla müxtəlif ölkələrin çeşidli dataları əsasında elmi metodların tətbiqi ilə icra edir.

MƏRKƏZİN HƏDƏFLƏRİ

Dəyişən dünyada istehlakçı davranışlarının öyrənilməsi, brend menecmenti və marketinq strategiyalarının hazırlanması üçün elmi əsaslı tədqiqat işlərinin hazırlanması mərkəzin əsas hədəfidir. Bu minvalla azərbaycanlı və xarici elm adamlarını tədqiqat işlərinə cəlb edərək bu işləri həyata keçirmək hədəflənmişdir. Bununla birlikdə azərbaycanlı və xarici bakalavr, magistr və doktoranturada təhsil alan tələbələri də tədqiqat işlərinə cəlb etməklə gələcəkdə elmi istiqaməti seçənlərə də dəstək olmaq hədəflənmişdir.

MƏRKƏZİN VƏZİFƏLƏRİ

Marketinq, İstehlakçı Davranışı və Brendinq Tədqiqat Mərkəzi öz məqsədini və hədəflərini reallaşdırmaq üçün aşağıdakı istiqamətdə işlər həyata keçirməkdədir:

·         Elmi tədqiqat işləri və layihələri həyata keçirmək;

·         Beynəlxalq və milli konfranslar, simpoziumlar, seminarlar, dəyirmi masalar və təlimlər təşkil etmək;

·         Ölkə daxilində və xaricdə yerləşən tədqiqat mərkəzləri, universitetlər, institutlar və özəl sektor təmsilçiləri ilə əməkdaşlıq etmək;

·         Mərkəzin iş  planını hazırlamaq və icra etmək;

·         Fəaliyyəti ilə bağlı hesabatlar hazırlamaq.