Prof. YAŞAR KƏLBİYEV

Kəlbiyev Yaşar Atakişi oğlu 4 aprel 1964-cü il tarixdə Lerik rayonunun Rəzgöv kəndində anadan olmuşdur. 1971-1978-ci illərdə Rəzgöv kənd səkkizillik məktəbində, 1979-1981-ci illərdə Lerik qəsəbəsi 1 nömrəli orta məktəbində oxumuşdur. Orta məktəbi bitirdikdən sonra bir il Lerik rayon Kənd Kimya Birliyində fəhlə işləmişdir.

1982-ci ildə M. Əzizbəyov adına Neft və Kimya  İnstitutunun mühəndis-iqtisad fakültəsinə daxil olmuş, 1989-cu ildə isə həmin institutu fərqlənmə diplomu ilə bitirmişdir.

1983-1985-ci illərdə ordu sıralarında hərbi xidmətdə olmuşdur.

İnstitutu bitirdikdən sonra M.Əzizbəyov adına Neft və Kimya  İnstitutunda stajçı-tədqiqatçı və mühəndis vəzifələrində çalışmış və 1991-1993-cü illərdə Azərbaycan Dövlət Neft Akademiyasının əyani şöbəsinin aspiranturasında təhsilini davam etdirmişdir. 1994-1995-ci illərdə Azərbaycan Dövlət Neft Akademiyasının «Maşınqayırma sənayesinin iqtisadiyyatı və idarə edilməsi» kafedrasının assistenti vəzifəsində çalışmışdır. 1995-1999-cu illərdə Elm və Təhsil Mərkəzi «Təfəkkur» Universitetində baş iqtisadçı vəzifəsində işləmişdir.

2000-2001-ci illərdə Azərbaycan Respublikası Vergilər Nazirliyinin Aparatında şöbə rəisi vəzifəsini, 2002-2013-cü illərdə Vergilər Nazirliyinin Tədris Mərkəzinin rəisi vəzifələrini icra etmişdir.

2013-cü ilin avqust ayından 2016-cı ilin iyun ayınadək  “Azərsu” ASC-nin “Sukanal” Elmi-Tədqiqat və Layihə İnstitutunun direktoru vəzifəsində çalışmış  və 2016-cı ilin iyul ayından hazırki vaxtadək “Azərsu” ASC-nin İqtisadiyyat və uçot idarəsinin rəisi vəzifəsində fəaliyyətini davam etdirir.

2002-ci ildən başlayaraq hazırki vaxta qədər Azərbaycan Dövlət İqtisad Universitetində (UNEC) elmi-pedoqoji fəaliyyətini davam etdirir. 2005-ci ildən UNEC-in “Vergi və vergiqoyma” kafedrasının 0,5 ştat əvəzçiliklə dosenti, 2008-ci ildən 2014-cü ilədək həmin kafedranın müdiri vəzifəsini icra etmişdir. 2015-2016-cı illərdə UNEC-in “Maliyyə və maliyyə institutları” kafedrasının 0,5 ştat əvəzçiliklə professoru vəzifəsində işləmişdir. 2017-ci ildən hazırki vaxtadək UNEC-in “İqtisadi və texnoloji elmlər” kafedrasının 0,5 ştat əvəzçiliklə müdiri vəzifəsində fəaliyyətini davam etdirir.

İqtisadi tənzimləməyə, xüsusilə də iqtisadiyyatın fiskal tənzimlənməsinə dair 110-də artıq elmi əsərin, o cümlədən 10 kitabın (4 dərslik, 3 dərs vəsaiti və 3 monoqrafiya) müəllifi və həmmüəllifidir.

1999-cu ildə «İnvestisiya layihələrinin təhlili metodlarının təkmilləşdirilməsi (neft və qaz sənayesi timsalında)» mövzusunda namizədlik dissertasiyasını, 2009-cu ildə isə «Fiskal tənzimlənməsinin makroiqtisadi problemləri və onların həlli yolları» mövzusunda doktorluq dissertasiyasını müdafiə etmişdir.

Azərbaycan Respublikası Prezidenti yanında Ali Attestasiya Komissiyası tərəfindən 2010-cu ildə ona dosent elmi adı, 2014-cü ildə isə professor elmi adı verilmişdir.

2015-2022-ci illərdə Azərbaycan Respublikası Prezidenti yanında Ali Attestasiya Komissiyasında İqtisadiyyat elmləri üzrə ekspert komissiyasının üzvü olmuşdur. 2023-2025-ci illərdə UNEC-in nəzdində fəaliyyət göstərən 5301.01 – Daxili fiskal siyasət və dövlət maliyyəsi, 5307.01 – İqtisadi nəzəriyyə, 5308.01 – Ümumi iqtisadiyyat və 5312.01 - Sahə iqtisadiyyatı ixtisasları üzrə iqtisad elmləri sahəsində fəlsəfə və elmlər doktoru dissertasiyalarının müdafiəsinin təşkili üçün yaradılan ED 2.10 olan Dissertasiya şurasının sədri olmuşdur.

Ailəlidir. Üç övladı vardır.